حاشى ولا انتي ابد منتي انسان
استغفر الله كيف اوصفك وشلون
انتي ركن عز الله اركان الايمان
آمنت به وأصبحت انا فيه مفتون
الناس لو شافوك تدرين وش كان
متاكد ان بكره براسك يحلفون
يا خبزة الغفران من ايد رهبان
جيت اعترف لك والخطا فيك مرهون
في معبد الحاخام من خلف بيسان
تجمعوا عشاق بيسان يبكون
مدري طقوس أو الهوى حزن واشجان
ولا على جدران هيروس يتلون
وفي دير قسيس ورث صك غفران
لقيت اهل العشق عنده يغنون
يترنموا في الحب ترتيل والحان
لحن زبيده سيدة قصر هارون
بحثت في كل المذاهب والاديان
وسالت أهل الذكر وشيوخ يخشون
هل الهوى رجس وبادعه شيطان
وليه البشر عن الهوى مايتوبون
فلم اجد فتوى ولا لوحة اعلان
ولقيتهم في كل وادي يهيمون
عندي غلو في الحب أحيان وأحيان
مره رشيد ومره تقول مجنون
تبختري ياشبخت الانس والجان
عليك بسم الله وابليس ملعون
وتفرعني يفداك يا بنت هامان
وتهيمني من فوق اهرام فرعون
0 تعليقات
يمكنك التعليق وسيتم الرد قريبا .. أحوكم محمد